Exo 39 | NdeIBE | STEP | Benza izambatho zokwenza umsebenzi endaweni engcwele ngokuzeluka ngentambo eluhlaza, eyibubende lebomvu. Basebesenza isambatho sika-Aroni esingcwele, njengalokhu uJehova wayelaye uMosi.

Exodus 39

Izambatho zobuphristi

1 Benza izambatho zokwenza umsebenzi endaweni engcwele ngokuzeluka ngentambo eluhlaza, eyibubende lebomvu. Basebesenza isambatho sika-Aroni esingcwele, njengalokhu uJehova wayelaye uMosi.

Isambatho semahlombe

2 Benza isambatho semahlombe ngegolide, kanye lentambo eluhlaza, eyibubende lebomvu langelembu elicolekileyo. 3 Bakhanda izicecedu zegolide bazisika zaba zincingo bazeluka ngentambo eluhlaza, eyibubende lebomvu, kanye lelembu elicokelileyo – kwaba ngumsebenzi wengcwethi. 4 Benza iziqa zemahlombe esambathweni leso, ezathungelwa inxa zonke ukuze sibotshelwe. 5 Ukhalo lwaso olwelukwa ngobuciko lwalufanana laso – luyinto yinye lesambatho semahlombe, lwenziwe ngegolide, lentambo eluhlaza, eyibubende lebomvu, kanye lelembu eliphothwe kuhle, njengalokhu uJehova walaya uMosi.

6 Bathungela amatshe aligugu ohlobo lweonekisi ezicecisweni zegolide badwebela njengophawu amabizo amadodana ako-Israyeli njengombazi wamatshe aligugu.

7 Basebewathungela kuziqa zemahlombe esambatho semahlombe njengamatshe esikhumbuzo kumadodana ka-Israyeli, njengalokhu uJehova walaya uMosi.

Isambatho sesifubeni

8 Benza isambatho sesifubeni – kwaba ngumsebenzi wengcwethi. Basenza njengesambatho semahlombe: ngegolide, ngentambo eluhlaza, eyibubende lebomvu, kanye lelembu eliphothwe kuhle. 9 Sasilingana inxa zonke – singumunwe ubude lomunwe ububanzi, sigoqwe saphindwa.

10 Basebethungela imizila emine yamatshe aligugu. Emzileni wakuqala kwakulevubhi, ithophezi kanye lebheriyeli; 11 emzileni wesibili kwakule-emaralidi, isafaya kanye ledayimana;

12 emzileni wesithathu kwakulejasinti, i-agathi kanye le-amethisi; 13 emzileni wesine kwakulekhirisolathi, i-onekisi kanye lejasipa. Athungelwa esezicecisweni zegolide.

14 Kwakulamatshe alitshumi lambili, lilinye limele ibizo ngalinye lamadodana ka-Israyeli, lilinye ngalinye ligujiwe ibizo kungani luphawu, ngalinye lilotshwe ibizo lezizwana zako-Israyeli ezilitshumi lambili.

15 Isambatho sesifubeni selukelwa amaketane egolide elicengekileyo kungani ligoda. 16 Benza iziceciso zegolide, kanye lamasongo amabili egolide, basebebophela amasongo amabili kumagumbi amabili egolide emasongweni amabili kumagumbi amabili esambatho sesifubeni. 17 Babophela amaketane amabili egolide emasongweni amabili asemagumbini esambatho sesifubeni, 18 kwathi ngapha acina khona bawabophela ezicecisweni ezimbili, bawahlanganisa eziqwini zemahlombe ngaphambili kwesambatho semahlombe.

19 Benza amasongo amabili egolide bawabophela kwamanye amagumbi amabili esambatho sesifubeni ngaphakathi komphetho phansi kwesambatho semahlombe. 20 Baphinda benza njalo amanye amasongo aba mabili egolide bawabophela ngaphansi kweziqa zemahlombe, eduze komphetho ngaphezudlwana kwebhanti lasokhalweni lwesambatho semahlombe.

21 Babophela amasongo esambatho sesifubeni kumasongo esambatho semahlombe ngentambo eziluhlaza, kuhlanganiselwa okhalweni ukuze isambatho sesifubeni singazunguzeki sehlukane lesambatho semahlombe njengalokhu uJehova walaya uMosi.

Ezinye izambatho zobuphristi

22 Benza isigqoko sesambatho semahlombe ngelembu eliluhlaza kuphela kungumsebenzi womaluki – 23 kulesikhala phakathi laphakathi kwesigqoko njengokuvuleka kwamabheqe; kulomphetho olandeliselwe isikhala lesi ukuze isambatho singadabuki. 24 Benza emphethweni wesigqoko amaphomegranethi ngentambo eluhlaza, eyibubende lebomvu, kanye lelembu eliphothwe kuhle. 25 Benza amabhera egolide elicengekileyo bawathungela emphethweni wesigqoko phakathi laphakathi kwamaphomegranethi.

26 Amabhera kanye lamaphomegranethi athungelwa agatshaniswa emphethweni wesigqoko esasizagqokwa ekwenzeni umsebenzi wenkonzo, njengalokhu uJehova walaya uMosi.

27 U-Aroni kanye lamadodana akhe bathungelwa amabhatshi ngelembu elicolekileyo – kungumsebenzi womeluki uqobo lwakhe –

28 kanye lamaqhiye elembu elicolekileyo, kanye lezambatho zangaphakathi zelembu elicolekileyo.

29 Ibhanti lekhalweni lathungwa ngelembu elicolekileyo kanye lentambo eluhlaza, eyibubende lebomvu – kungumsebenzi wombalazi ngokuthunga – njengalokhu uJehova walaya uMosi.

30 Benza umganu, umqhele ongcwele, ngegolide elicolekileyo bawugubhela khona njengombhalo wophawu othi: UBUNGCWELE ABUBE KUJEHOVA. 31 Basebebophela kuwo intambo eluhlaza ukuze bahlanganise umganu wegolide leqhiye, njengalokhu uJehova walaya uMosi.

UMosi uhlola iThabanikeli

32 Ngakho-ke wonke umsebenzi wethabanikeli, iThente lokuHlanganela wawusuphelile. Abako-Israyeli benza konke njengalokhu uJehova walaya uMosi.

33 Basebesethulela uMosi ithabanikeli: ithente kanye lazo zonke izimpahla zalo, izingwegwe, amathala, imithando, izinsika kanye lezisekelo;

34 isembeso esenziwe ngezikhumba zenqama eziphendulwe ngomphendulo obomvu, isembeso sezikhumba zenyamazana zolwandle kanye lekhetheni elisithiweyo; 35 ibhokisi lobufakazi lezigodo zalo eziyizibambo kanye lesihlalo somusa; 36 itafula lezitsha zalo zonke kanye lesinkwa esahlukaniselwe uJehova;

37 uluthi lwesibane lwegolide elicengekileyo lodwendwe lwezibane lazo zonke izinto ezisetshenziswa kulo, kanye lamafutha okukhanyisa; 38 i-alithare legolide, amafutha okugcoba abakhethiweyo, impepha elephunga elimnandi, kanye lekhetheni lesango lethente;

39 i-alithare lethusi leminxibo yalo yokosisa yethusi, izigodo zalo eziyizibambo lezitsha zalo zonke; umkolo lezinyawo zawo; amakhetheni eguma lezinsika zawo kanye lezisekelo,

40 lekhetheni lesango leguma; amagoda lezikhonkwane zethente leguma; zonke impahla zethabanikeli, iThente lokuHlanganela;

41 izambatho ezelukiweyo zokusetshenziswa emsebenzini wokukhonza endaweni engcwele, kuhlanganisa izambatho ezingcwele zika-Aroni lezamadodana akhe ababezazigqoka nxa besenza umsebenzi wobuphristi.

42 Abako-Israyeli basebenza wonke umsebenzi njengalokhu uJehova ayelaye uMosi.

43 UMosi wawuhlola umsebenzi wabona ukuthi wawenziwe njengokulaya kukaJehova. Ngakho uMosi wababusisa.